Производителите ќе бидат принудени да создадат универзално решение за полнење на телефони и мали електронски уреди, според новото правило предложено од Европската комисија (ЕК).

Целта е да се намали отпадот со охрабрување на потрошувачите повторно да ги користат постоечките полначи кога купуваат нов уред.
Сите паметни телефони што се продаваат во ЕУ мора да имаат USB-C полначи, се вели во предлогот.

Apple предупреди дека таквиот потег ќе им наштети на иновациите.

Технолошкиот гигант е главниот производител на паметни телефони кои користат прилагодена порта за полнење, бидејќи неговата серија iPhone користи конектор „Lightning“ направен од Apple.

„Остануваме загрижени дека строгата регулатива која наложува само еден тип на конектори ја задушува иновативноста наместо да ја охрабрува, што пак ќе им наштети на потрошувачите во Европа и ширум светот“, изјавија од компанијата за Би-Би-Си.

Повеќето телефони со Android доаѓаат со порти за полнење USB micro-B или веќе се префрлени на помодерниот USB-C стандард.

Новите модели на iPad и MacBook користат порти за полнење USB-C, како и моделите на телефони од високата класа од популарните производители на Android, како што се Samsung и Huawei.

Промените би се однесувале на приклучокот за полнење на телото на уредот, додека крајот на кабелот што се поврзува со приклучокот може да биде USB-C или USB-A.

Околу половина од полначите продадени со мобилни телефони во Европската унија во 2018 година имале USB микро-Б конектор, додека 29% имале USB-C конектор и 21% конектор Lightning, покажа студијата за проценка на влијанието на Комисијата во 2019 година.

Предложените правила ќе важат за:

паметни телефони
таблети
камери
слушалки
преносни звучници
рачни конзоли за видео игри