Prodhuesit do të detyrohen të krijojnë një zgjidhje universale karikimi për telefonat dhe pajisjet e vogla elektronike, sipas një rregulli të ri të propozuar nga Komisioni Evropian (KE).

Qëllimi është të zvogëlohen mbeturinat duke i inkurajuar konsumatorët të ripërdorin karikuesit ekzistues kur blejnë një pajisje të re.
Të gjithë telefonat inteligjentë të shitur në BE duhet të kenë karikues USB-C, thuhet në propozim.

Apple ka paralajmëruar se një veprim i tillë do të dëmtonte inovacionin.

Gjigandi i teknologjisë është prodhuesi kryesor i telefonave inteligjentë që përdorin një port karikimi të personalizuar, pasi seria e tij e iPhone përdor një lidhës "Lightning" të prodhuar nga Apple.

"Ne mbetemi të shqetësuar se rregullorja e rreptë që detyron vetëm një lloj lidhësi pengon inovacionin në vend që ta inkurajojë atë, gjë që nga ana tjetër do të dëmtojë konsumatorët në Evropë dhe në mbarë botën", tha firma për BBC-në.

Shumica e telefonave Android vijnë me porta karikimi USB micro-B, ose janë zhvendosur tashmë në standardin më modern USB-C.

Modelet e reja të iPad dhe MacBook përdorin porta karikimi USB-C, ashtu si edhe modelet e telefonave të nivelit të lartë nga prodhuesit e njohur të Android si Samsung dhe Huawei.

Ndryshimet do të zbatohen në portën e karikimit në trupin e pajisjes, ndërsa fundi i kabllit që lidhet me një prizë mund të jetë USB-C ose USB-A.

Rreth gjysma e karikuesve të shitur me telefona celularë në Bashkimin Evropian në vitin 2018 kishin një lidhës USB micro-B, ndërsa 29% kishin një lidhës USB-C dhe 21% një lidhës Lightning, zbuloi një studim i vlerësimit të ndikimit të Komisionit në vitin 2019.

Rregullat e propozuara do të zbatohen për:

telefonat inteligjentë
tableta
kamerat
kufje
altoparlantë portativë
konsola video lojërash portative